100+ Bugtong na may Sagot: Luma at Makabago [2024]

Ang bugtong o riddle ay isang uri ng palaisipan o tanong na idinisenyo upang hamunin ang isipan at mag-stimulate ng malikhain na pag-iisip. Karaniwan itong naglalaman ng isang pahayag o tanong na tila may simpleng sagot, ngunit hindi pala.

Kailangan mong paganahin ang iyong pagiging malikhain sa pag-iisip at maging mapagmasid dahil ang sagot dito ay nakakubli sa isang matalinong paraan.

palaisipan

Ang mga bugtong ay maaaring nakakatuwa at nakakapaglibang, at karaniwan itong ginagamit bilang isang uri ng sosyal o intelektuwal na pakikipag-ugnayan.

Maaari rin itong gamitin upang turuan ang kasanayan sa kritikal na pag-iisip at upang mag-udyok ng malikhain na pag-iisip. May iba’t-ibang uri ng mga bugtong, mula sa simpleng mga palaisipan hanggang sa mas kumplikadong mga palaisipan.

Ang mga bugtong ay isang bahagi ng kultura at panitikan ng mga Pilipino at mayroon ding iba’t-ibang uri tulad ng mga bugtong tungkol sa hayop, prutas, gulay, tao, lugar, at iba pa.

Mga Bugtong Tungkol sa Hayop

  1. Kay liit pa ni Neneng marunong ng kumendeng.
    Sagot: Bibe

  2. Anong hayop ang dalawa ang buntot?
    Sagot: Elepante

  3. Ang ulo ay kabayo, ang leeg o balabal ay pari, ang katawan ay uod, ang paa ay lagare.
    Sagot: Tipaklong

  4. Naghanda ang alila ko, nauna pang dumulog ang tusko.
    Sagot: Langaw

  5. Ito na si bayaw dala-dala ay ilaw.
    Sagot: Alitaptap

  6. Kinain ko ang isa ang tinapon ko ay dalawa.
    Sagot: Tulya
  7. Bata pa si Nene marunong nang manahi.
    Sagot: Gagamba

  8. Alin sa mga ibon ang di nakakadapo sa mga kahoy?
    Sagot: Pugo

  9. Matanda na ang nuno hindi pa naliligo.
    Sagot: Pusa

  10. Kahoy ko sa marigundong, sumasanga’y walang dahon.
    Sagot: Sungay ng usa

  11. Aling bagay sa mundo ang inilalakad ay ulo?
    Sagot: Suso (snail)

  12. Sa araw ay nahihimbing at sa gabi ay gising.
    Sagot: Paniki

  13. Tiniris mo na inaamuyan pa.
    Sagot: Surot

  14. Heto na si lelong bubulong-bulong
    Sagot: Buguyog

  15. Tag-ulan o tag-araw hanggang tuhod ang salawal.
    Sagot: Manok

  16. Bahay ni Ka Huli haligi’y bali-bali, ang bubong ay kawali.
    Sagot: Alimango

  17. Mataas kung nakaupo mababa kung nakatayo.
    Sagot: Aso

  18. Maliit pa si kumpare, nakaka-akyat na ng tore.
    Sagot: Langgam

  19. Sinturong walang mapaggamit-gamitan, bastong hindi mahawak-hawakan.
    Sagot: Ahas

  20. Kahit hindi tayo magkaano-ano, ang gatas ng anak ko ay gatas din ng anak mo.
    Sagot: Baka

  21. Pag munti’y may buntot, paglaki ay punggok.
    Sagot: Palaka

  22. Ibon kong saan man makarating, nakababalik kung saan nanggaling.
    Sagot: Kalapati

  23. Ang mukha’y parang tao, magaling lumukso.
    Sagot: Unggoy

  24. Heto na si Mang Topak, kokak ng kokak
    Sagot: Palaka

  25. Hakot dito, hakot doon, kahit maliit ay ipon ng ipon
    Sagot: Langgam
tandang pananong - bugtong

Bugtong Tungkol sa Bagay

  1. Eto na si Kaka, bubuka-bukaka.
    Sagot: Gunting

  2. Tubig na nagiging bato, batong nagiging tubig
    Sagot: Asin

  3. Maliit na bahay, puno ng mga patay.
    Sagot: Posporo

  4. Dumaan ang hari, nagkagatan ang mga pari.
    Sagot: Zipper

  5. Bumili ako ng alipin mas mataas pa sa akin.
    Sagot: Sumbrero

  6. Isa ang pasukan, tatlo ang labasa.
    Sagot: Kamiseta

  7. Isang hukbo ng sundalo, dikit-dikit ang mga ulo.
    Sagot: Walis

  8. May bintana subalit walang bubungan, may pinto ngunit wala namang hagdanan.
    Sagot: Kumpisalan

  9. Kaisa-isang plato, kita sa buong mundo.
    Sagot: Buwan (moon)

  10. Ihagis mo man kahit saan, sadyang babalik at babalik sa pinanggalingan.
    Sagot: Yoyo

  11. Nagtago si Pedro, nakalabas ang ulo.
    Sagot: Pako

  12. Kung gabi ay malapad, kung araw ay matangkad.
    Sagot: Banig

  13. Dala mo, dala ka, dala ka pa ng iyong dala.
    Sagot: Sapatos

  14. May apat na binti hindi makalakad.
    Sagot: Lamesa

  15. Naabot na ang kamay, ipinagawa pa sa tulay.
    Sagot: Kubyertos

  16. Malaking supot ni Mang Jacob, kung sisidlan ay pataob.
    Sagot: Kulambo

  17. Ako ay may kaibigan kasama ko kahit saan.
    Sagot: Anino

  18. Sa maling kalabit, may buhay na kapalit.
    Sagot: Baril

  19. Sa buhatan ay may silbi, sa igibin ay walang sinabi.
    Sagot: Bayong o basket

  20. Hindi tao, hindi hayop, kung uminom ay salup-salop.
    Sagot: Batya

  21. Buto’t balat na malapad, kay galing kung lumipad.
    Sagot: Saranggola

  22. Lumuluha walang mata, lumalakad walang paa.
    Sagot: Ballpen

  23. Nagbibigay na, sinasakal pa.
    Sagot: Bote

  24. May puno walang bunga, may dahon walang sanga.
    Sagot: Sandok

  25. Hinila ko ang banig, sumigaw ang matsing.
    Sagot: Kampana

  26. Hindi hayop, hindi tao, pumupulupot sa tiyan mo.
    Sagot: Sinturon

  27. Kung kailan mo pinatay, saka pa humaba ang buhay.
    Sagot: Kandila

  28. Wala sa langit, wala sa lupa, kung tumakbo ay patihaya.
    Sagot: Bangka

  29. Binatak ko ang isa, tatlo pa ang sumama.
    Sagot: Panyo

  30. Bugtong kung sapin-sapin, nakasabit, nakabitin, araw kung bilangin, isang taon kung tapusin.
    Sagot: Kalendaryo

  31. Binatak ko ang banig, bumuka ang tikin.
    Sagot: Payong

  32. Kundi sa bibig ko ay nagutom ang barbero.
    Sagot: Gunting

  33. Isang biyas na kawayan, maraming lamang kayamanan.
    Sagot: Alkansiyang kawayan

  34. Kayraming nakahiga, iilan lang ang abot sa lupa.
    Sagot: Bakod

  35. Nagsaing ako sa apoy, tubig ang iginatong.
    Sagot: Gasera

  36. Malambot na parang ulap, kasama ko sa pangangarap.
    Sagot: Unan
doktor

Bugtong Tungkol sa Tao o Katawan

  1. Heto na ang magkapatid, nag-uunahang pumanhik
    Sagot: Mga paa

  2. Dalawang batong itim, malayo ang nararating.
    Sagot: Mga mata

  3. Kay lapit-lapit na sa mata, di mo pa rin makita.
    Sagot: Tenga

  4. Isang bakud-bakuran, sari-sari ang nagdaan.
    Sagot: Ngipin

  5. Isang pirasong karne, laging basa.
    Sagot: Dila

  6. Limang magkakapatid, iisa ang dibib.
    Sagot: Kamay

  7. “Nandoon, nandoon” ang sabi, wala naman mga mata.
    Sagot: Hintuturo

  8. Isang balong malalim, puno ng patalim
    Sagot: Bibig

  9. Tatal na munti, panggamot sa kati.
    Sagot: Kuko

  10. Isang bayabas, pito ang butas
    Sagot: Mukha

  11. Halamang di nalalanta kahit natabas na.
    Sagot: Buhok

  12. Dalawang magkaibigan, nasa likod ang mga tiyan.
    Sagot: Binti

  13. Isang bundok, hindi makita ang tuktok.
    Sagot: Noo

  14. Dalawang libing, laging may hangin.
    Sagot: Ilong

  15. Limang magkakapatid, laging kabit-kabit
    Sagot: Daliri

  16. Aling parte ng katawan ang hindi nababasa?
    Sagot: Utak

  17. Dalawang punso-punsuhan, ang laman ay kaligtasan.
    Sagot: Suso ng ina

  18. Batong marmol na buto, binalot ng gramatiko
    Sagot: Ngipin

  19. Hindi tao, hindi hayop, kung uminom ay salup-salop.
    Sagot: Batya

  20. Buto’t balat na malapad, kay galing kung lumipad.
    Sagot: Saranggola

  21. Maliliit na sugat sa bibig, dahil sa tag-init at di sa taglamig.
    Sagot: Singaw

  22. Munting bundok, hindi madampot.
    Sagot: Tae

  23. Anong bunga ang malayo sa sanga?.
    Sagot: Bungang-araw

Bugtong Tungkol sa Prutas, Gulay at Pagkain

mga prutas
  1. Bahay ng anluwagi, iisa ang haligi.
    Sagot: Kabute

  2. Baboy ko sa pulo, ang balahibo’y pako.
    Sagot: Langka

  3. Nakayuko ang reyna di nalalaglag ang korona.
    Sagot: Bayabas

  4. Isang prinsesa nakaupo sa tasa.
    Sagot: Kasoy

  5. Ate mo, ate ko, ate ng lahat ng tao.
    Sagot: Atis

  6. Isang tabo, laman ay pako.
    Sagot: Suha

  7. Kung tawagin nila’y santo hindi naman milagroso.
    Sagot: Santol

  8. Bulaklak muna ang dapat gawin, bago mo ito kanin.
    Sagot: Saging

  9. Nakatalikod na ang prinsesa, ang mukha’y nakaharap pa.
    Sagot: Balimbing

  10. Tatlong bundok ang tinibag, bago narating ang dagat.
    Sagot: Niyog

  11. Hindi Linggo, hindi piyesta, naglawit ang bandera.
    Sagot: Dahon ng Saging

  12. Isang magandang prinsesa, ligid na ligid ng espada.
    Sagot: Pinya

  13. Bahay ni Mang Pedro, punung-puno ng bato.
    Sagot: Papaya

  14. Balat niya’y berde, buto niya’y itim, laman niya’y pula, sino siya?
    Sagot: Pakwan

  15. Butong binalot ng bakal, bakal na binalot ng kristal
    Sagot: Lansones

  16. Baboy ko sa Mariveles, balahibo’y matutulis.
    Sagot: Langka

  17. Hindi naman hari, hindi naman pari, laging naka-korona.
    Sagot: Bayabas

  18. Maganda kong senyorita, susun-suson ang saya.
    Sagot: Puso ng saging

  19. Ulan ng ulan, hindi pa rin mabasa ang tiyan.
    Sagot: Dahon ng gabi

  20. Isda ko sa Maribeles, nasa loob ang kaliskis.
    Sagot: Sili

  21. Nung munti pa ay paruparo, nang lumaki ay latigo.
    Sagot: Sitaw

  22. Nang sumipot sa maliwanag, kulubot na ang balat.
    Sagot: Ampalaya

  23. Puno ko sa probinsya, puno’t dulo ay mga bunga.
    Sagot: Puno ng Kamyas

  24. Gulay na granate ang kulay, matigas pa sa binti ni Aruray, pag nilaga ay lantang katuray.
    Sagot: Talong
  25. Ikaw na ang humihiwa-hiwa ay siya pang lumuluha
    Sagot: Sibuyas

  26. Isang kumpol na ngipin, nakabalot sa papel
    Sagot: Bawang

  27. Gulay na may arte ang porma, berdeng buhok tinirintas sa umaga.
    Sagot: Sigarilyas

  28. Nang ihulog ko’y buto, nang hanguin ko’y malaking trumpo.
    Sagot: Singkamas

  29. Munggo ito na ipinunla sa taniman, naging puno itong walang dahong malalabay.
    Sagot: Toge

  30. Pamalo ni Mang Selo, mula paa hanggang ulo, nailuluto mo rin ito.
    Sagot: Upo

  31. Mapa-tubig, mapa-lupa, ang dahon ay laging sariwa.
    Sagot: Kangkong

  32. Hugis puso, kulay ginto, anong sarap kung kagatin, malinamnam kung kainin.
    Sagot: Mangga

  33. Isang magandang dalaga, di nabibilang ang sandata.
    Sagot: Pinya

  34. Kampanilya ni Kaka, laging mapula ang mukha.
    Sagot: Makopa

  35. Sinampal ko muna bago ko inalok.
    Sagot: Sampalok

  36. Magkapatid na prinsesa, lahat nama’y pawang negra.
    Sagot: Duhat

  37. Puno’y bumbong, sanga’y ahas, bunga’y gatang, lama’y bigas.
    Sagot: Papaya

  38. Isang pamalo, punung-puno ng ginto.
    Sagot: Mais

  39. Nang maglihi’y namatay, nang manganak ay nabuhay.
    Sagot: Sinigwelas
  40. Maputing parang kanin, dahon ng saging idinamit sa kanya.
    Sagot: Suman

  41. Malambot na kalamay na may katamisan, malinamnam at gawang Kapampangan.
    Sagot: Tamales

  42. Mga isdang nagsisiksikan sa latang kanilang tahanan.
    Sagot: Sardinas

  43. Karaniwang dinikdik itong baka, na kapag ipinirito ay katakam-takam na.
    Sagot: Tapa

  44. Pagbali-baliktarin man din, may butas pa rin.
    Sagot: Donut

  45. Pritong saging sa kalan, lumutong pagkat dinamitan.
    Sagot: Turon

  46. Gatas na inasukalan, selopeyn ang pinagbalutan.
    Sagot: Yema

Bugtong Tungkol sa Kalikasan

bukirin
  1. Bumubuka’y walang bibig, ngumingiti ng tahimik.
    Sagot: Bulaklak

  2. Baka ko sa Bataan, abot dito ang unga.
    Sagot: Kulog

  3. Ayan na, ayan na, hindi mo pa makita.
    Sagot: Hangin

  4. Nang umalis ay lumilipad, nang dumating ay umuusad.
    Sagot: Ulan

  5. Kaisa-isang plato, kita sa buong mundo.
    Sagot: Buwan

  6. Manok kong pula, inutusan ko ng umaga, nang umuwi ay gabi na.
    Sagot: Araw

  7. Palda ni Santa Maria, ang kulay ay iba-iba.
    Sagot: Bahaghari

  8. May kabayo akong payat, pinalo ko ng patpat, lumukso ng pitong gubat, naglagos ng pitong dagat.
    Sagot: Alon

  9. Bulak na bibitin-bitin, hindi pwedeng balutin.
    Sagot: Ulap

  10. Kumindat ang Sultan, natakot ang bayan.
    Sagot: Kidlat

  11. Putukan ng putukan, hindi naman magkarinigan.
    Sagot: Kamatsile

  12. Tablang magkabila, alulod ang gitna.
    Sagot: Dahon ng saging

  13. Nang bata ay nagsaya at naghubo nang dalaga.
    Sagot: Kawayan

  14. Sa init sumasaya, sa lamig ay nalanta.
    Sagot: Akasya

  15. Nang maalaala’y naiwan, nadala nang malimutan.
    Sagot: Amorseco

  16. Bungang pinagdahunan, dahong pinagbungahan.
    Sagot: Pinya

  17. May langit, may lupa, may dagat, walang isda.
    Sagot: Niyog

  18. Nagsaing si Ingkong, sumusulak ay wala naman gatong.
    Sagot: Gugo

Ano ang mga Magagandang Naidudulot ng mga Bugtong?

Ang bugtong ay naging bahagi na ng pang-araw-araw na buhay natin. Naalala ko pa noon na lagi kaming nagbubugtungan ng aking nanay, tatay, mga kapatid, ng lolo at ng lola. Isa ito sa mga libangan namin noong hindi pa panahon ng mga celphone, internet at Netflix.

At sa totoo lang, maraming magagandang naidudulot ng mga bugtong o ang paglalaro ng palaisipan. Narito ang ilan sa mga ito:

  1. Ang mga bugtong ay nagpapalakas ng kakayahang mag-isip dahil kailangan natin suriin, maging malikhain at mag-isip upang makasagot sa palaisipan.

  2. Masayang maglaro ng bugtungan! Ang mga bugtong ay maaaring magbigay ng aliw at kaligayahan sa mga taong nag-eenjoy sa pagsagot ng mga palaisipan. Maganda rin itong libangan ng pamilya o ng mga magkakaibigan.

  3. Sa pamamagitan ng pagbasa o pakikinig sa mga bugtong, nakakatulong ito upang palawakin ang bokabularyo ng isang tao dahil kinakailangan ng pagsasaliksik at pag-unawa sa kahulugan ng mga salita.

  4. Ang mga bugtong ay bahagi ng kultura at panitikan ng mga Pilipino. Sa pamamagitan ng pagpasa ng mga bugtong sa susunod na henerasyon, nakakatulong ito sa pagpapanatili ng kultura at tradisyon ng mga Pilipino.

Maaari ba Akong Gumawa ng Sarili Kong Bugtong?

Oo naman, pwedeng pwede! Wala naman bawal kung ikaw ay nagnanais gumawa ng sarili mong mga bugtong. Hindi mo kailangan ng anumang espesyal na kakayahan upang gumawa ng bugtong.

Narito ang ilan naming tips para sayo:

  1. Pumili ng paksa

    Una sa lahat, kailangan mong pumili ng paksa para sa iyong bugtong. Maaaring ito ay tungkol sa hayop, gulay, prutas o lugar.

  2. Mag-isip ng mga katangian.

    Pagkatapos ng pagpili ng paksa, kailangan mong mag-isip ng mga katangian na may kaugnayan dito. Halimbawa, kung ang paksa ay tungkol sa hayop, maaaring itanong ang mga katangiang pisikal nito o ang mga mahilig gawin nito.

  3. Mag-isip ng mga maikling pangungusap.

    Pagkatapos ng pagpili ng paksa at mga katangian, kailangan mong mag-isip ng maikling pangungusap na magpapahirap sa mambabasa o tagapakinig upang makasagot sa palaisipan.

    Maaaring gamitin ang mga salitang magkakaugnay, magkakatunog o mga salitang may magkakaibang kahulugan. Lagi mong tandaan na dapat ay maiksi at klaro ang iyong mga bugtong nang sa ganoon ay hindi mahirapan ang iyong pagtatanungan nito.

  4. Tapusin ang iyong bugtong.

    Pagkatapos ng pag-iisip ng mga elemento, kumpletuhin mo na ang bugtong. Siguraduhin na ito ay talagang akma sa sagot at yung tipong hindi masyadong mahirap sagutin.

Mga Karaniwang Tanong tungkol sa mga Bugtong

Ano ang English ng bugtong?

Riddle ang English word ng bugtong.

Nakakahasa ba ng pag-iisip ang mga bugtong?

Oo, nakabubuti para sa ating utak at pag-iisip ang paglalaro ng mga bugtong. Ang pag-iisip ng mga kasagutan sa mga bugtong ay nakakahasa ng kakayahan natin na mag-isip, tumuon ng atensyon at magkaroon ng malikhain na pag-iisip.